ചുറ്റുവട്ടം

                                                   ആള്‍ മരം 

 

ബോണ്‍സായ് 

എന്നു കരുതി 

ചട്ടിയില്‍ നട്ട് 

റൂമില്‍ വെച്ചത്
ആല്‍മരമായി 
വളര്‍ന്നാല്‍
മോന്തായം 
മൂര്‍ദ്ധാവില്‍ 
അമ്പും; പിന്നെ…
നട്ടവര്‌ ബൌണ്‍സാകും!

മുറിപ്പാവാട 
ചിലര്‍ 

ബോബനും മോളിയും
പോലെയാണ്..
വളരാത്ത
കഥാപാത്രങ്ങള്‍;

അതേ മുറിപ്പാവാട

അതേ വള്ളിട്രൌസറും
വിക്രിയകളും!

പല്ലിക്കാലം 
പള്ളി പണിതു
പുണ്യം തേടിയവര്
പല്ലികള്‍ക്ക് 
കാതോര്‍ക്കുന്നു
പള്ളിയേക്കാള്‍
പല്ലി വലുതായാല്‍
പിന്നെ ഒരു കെട്ട്
പുല്ലു തിന്നലാ ഭേദം

ഒന്നുണ്ട്

ആചാരം കൊണ്ടല്ല
സദാചാരം വിളയുക
വസ്ത്ര-മുരിഞ്ഞാലല്ല
സ്ത്രീത്വം വളരുക

മദ്യക്കസര്ത്തു കൊണ്ടല്ല
ആതിഥേയ പ്രഭുവാകുക
തീറ്റയും വിരിപ്പും പകുത്തല്ല
കുട്ടിയും പട്ടിയും പോറ്റുക

പരസ്യപ്പലകകള്‍ എണ്ണിയല്ല
പുരോഗമനത്തിന്റെ ഗ്രാഫിടുക
മൂല്യങ്ങള്‍ നിരാകാരിച്ചല്ല
മഹാ പരിഷ്കാരിയാവുക

അകം പുഴുത്തവനെ ചേര്‍ത്തല്ല
സൗഹൃദം പണിയുക
ബോധം മരവിച്ച ചുഴിയിലല്ല 
രക്ഷാകര്‍തൃത്വം നടുക  

മുടിയും മണ്ണും കലക്കിക്കുടിച്ചല്ല
'ഭക്തി' വളര്ത്തുക
ഭ്രാന്തും ഭ്രമവും കൂട്ടിക്കുഴച്ചല്ല
ആത്മീയ വാദിയാവുക

ഒന്നുണ്ട്...
പെരും കള്ളന്മാരെ

വെള്ള പൂശിയാണ്

സ്വയം നശിക്കുന്നത്!

ന്നാ...ശരി

നല്ല കുടമായിരുന്നു...

പറഞ്ഞിട്ടെന്താ! ആടിന്റെ തല അതില്‍ കുടുങ്ങി..വാ വട്ടം കുറവായാല്‍ അങ്ങിനെയാ.

എല്ലാവരും കൂടി 'തന്ത്രശാലി' യായ വല്ല്യുമ്മാനെ സമീപിച്ചു...ഒരു പ്രശ്നം വരുമ്പോള്‍ അതാ അവിടെ പതിവ്.

ഞി പ്പോ... ന്താ ചെജ്ജാ?

വല്ല്യുമ്മ ചിന്തയില്‍ മുഴുകി

"ആട്ന്റെ തല ബെട്ടിക്കാളി... ബേറെ യാതൊരു ബജ്ജും ല്യ!"

ഉപദേശം കിട്ടേണ്ട താമസം, അവര്‍ അത് നടപ്പാക്കി ...ആടിന്റെ തല കുടത്തിനകത്തേക്ക് വീണു!

പ്രശ്നം രൂക്ഷമായി !!

അവര്‍ വല്ല്യുമ്മാന്റെ അടുത്തേക്ക്‌ തന്നെ ഓടി...

"തല എങ്ങിനെ എടുക്കും?"

വല്ല്യുമ്മ ചുണ്ടുകള്‍ അങ്ങോട്ടു- മിങ്ങോട്ടും ചലിപ്പിച്ചു. ആടിക്കളിക്കുന്ന വലിയ ഒറ്റപ്പല്ല് നാവു കൊണ്ട് പല തവണ തള്ളി നോക്കി. പിന്നെ കാലുകള്‍ രണ്ടും നീട്ടി വളഞ്ഞിരുന്നു.

നേരിയ മൌനത്തിനു ശേഷം അവര്‍ മൊഴിഞ്ഞു

"കൊടം പൊട്ടിച്ചാളി ...ബേറെ യാതൊരു ബജ്ജും ല്യ!"

അവര്‍ക്ക് സമാധാനമായി...

തിരിഞ്ഞു നടക്കുമ്പോള്‍ പിറകില്‍ വല്ല്യുമ്മയുടെ പതിഞ്ഞ തേങ്ങല്‍ കേട്ട് കൂട്ടത്തില്‍ ആരോ ചോദിച്ചു

"ന്തേ...ന്താ ണ്ടായത്?"

"ഒന്നുല്ല്യ..." (അവര്‍ പിന്നേം തേങ്ങി!)

"ന്നാലും...?"

"ന്റെ കാലം കൈഞ്ഞാ... ഇങ്ങനെ ഉപദേസം തെരാന്‍...... ങ്ങക്ക് ആരാ ള്ളത്?"
വല്ല്യുമ്മ നിര്‍ത്താതെ വിങ്ങി!